Begjin

Yn 2018 wie Ljouwert Kulturele Haadstêd fan Europa (LF2018). Tryater ûntwikkele 2018Ferhalen as ien fan ’e iepeningsaktiviteiten fan dit bysûndere jier. It doel? De keunst fan it ferhalefertellen wer op de kaart sette en minsken byinoar bringe troch persoanlike ferhalen te dielen, mei as resultaat in sterk gefoel fan ferbûnens.

Fan eksperimint nei in jierliks evenemint
Sûnt 2019 hat Pier21 it evenemint fierder ûntwikkele en útwreide ta in jierliks weromkommend barren op de tredde freed fan novimber. Troch nije fertelmetoaden te testen en te ferbetterjen, binne ferhalen hieltyd krêftiger en tagonkliker wurden. Dizze kennis is frij beskikber steld, wat bydroegen hat oan de groei en it súkses fan Verhalenavond. Underwilens wurde der jierliks op mear as hûndert plakken ferhalen dield troch mear as tweintich fertellers. Yn 2024 wie der sels in Verhalenavond yn Austraalje.

Sûnt trije jier wurket Verhalenavond gear mei de toanieloplieding fan NHL Stenden om de keunst fan it ferhalefertellen troch te jaan oan takomstige generaasjes. De studinten jouwe les op basisskoallen en leare learlingen persoanlike ferhalen te dielen foar publyk.

In nije faze: Verhalenavond en it FBN
No brekt in nije faze oan: it fêstigjen en fierder ûntwikkeljen fan Verhalenavond binnen it Fryske Biblioteken Netwurk (FBN). Sûnt 2025 leit de organisaasje yn harren hannen.

In groeiend evenemint mei wikseljende tema’s
Eltse edysje fan Verhalenavond stiet yn it teken fan in nij tema. De earste edysje hie as tema ‘In foarwerp’. Fertellers út de hiele provinsje dielden ferhalen dêr’t in objekt sintraal yn stie of in bysûndere rol yn spile. Minsken kamen byinoar op ferskate lokaasjes yn Fryslân: musea, kafeeën, teäters, biblioteken, mar ek yn yntime settingen by minsken thús.

Sûnt dy earste edysje hat Verhalenavond alle jierren in nij tema hân:

2018: Foarwerp
2019: As stiennen prate koene
2020: It firus
2021: Taal fan myn hert
2022: De Ommekear
2023: Myn Reis
2024: ’t Fjoer yn my
2025: Doe’t ik moed hie